पुडासैनी घटना अब सिआइबीको हातमा

प्रकाशित मिति : सोमवार, भदौ २, २०७६

काठमाडाैंः पछिल्लो समय चर्चामा रहेको माउन्टेन टेलिभिजनका पत्रकार शालिकराम पुडासैनी जीवनत्याग काण्ड अब थप गहिराइमा पुग्ने देखिएको छ । चितवन जिल्लाको कंगारु होटलमा झुन्डिएको अवस्थामा फेला परेका पुडासैनीको पोस्टमार्टम रिपोर्ट चितवन प्रहरीले मंगलबार पाएको छ ।

तर,प्रहरीले रिपोर्टमा के छ भन्ने सार्वजनिक गर्न मानिएको छैन । जिल्ला प्रहरी कार्यालय चितवनका प्रमुख एसपी दावबहादुर मल्लले भने, ‘पोस्टमा’र्टम रिपोर्ट प्राप्त भएको छ । तर, रिपोर्टमा लेखिएको कुरा सार्वजनिक गर्न मिल्दैन । हामी सबै प्रमाण जुटाउँदै छौँ । यस क्रममा थप नयाँ तथ्य पनि फेला परेको छ । अनुसन्धानपछि सबै तथ्य सार्वजनिक हुनेछ।’

गत साउन २० मा मृत भेटिएका पुडासैनीको २२ साउनमा काठमाडौं महाराजगन्जस्थित शिक्षण अस्पतालमा पोस्टमार्टम भएको थियो । अस्पतालले १० दिन लगाएर रिपोर्ट तयार पारेको हो । पोस्टमार्टम रिपोर्टसँगै मृत्युअघि रेकर्ड गरिएको भिडियोको फरेन्सिक ल्याब परीक्षण पनि भइसकेको हो ।

पोस्टमार्टम र भिडियो ल्याब रिपोर्ट थप अनुसन्धानका लागि बलियो प्रमाण बनेको प्रहरी बताउँछ । नुवाकोट बेलकोटगढी नगरपालिका–३ घर भएका २७ वर्षीय शालिकराम पुडासैनी पछिल्लो समय माउन्टेन टिभीमा गएका थिए । उनले एक वर्ष भन्दा लामो समय रवि लामिछानेको कार्यक्रम सिधा कुरा जनतासँग काम गरेका थिए ।

यसबीचमा यो घटनाको अनुसन्धान गर्न केन्द्रीय अनुसन्धान ब्युरो (सिआइबी)ले गर्ने भएको छ । सिआइबी प्रवक्ता एसपी दीपक रेग्मी चितवन पुगेका छन् । एसपी रेग्मीसहित केही अधिकृत गरी पाँचजनाको टोली अनुसन्धानका लागि चितवन गएको हो । मृत्युसँग जोडिएका विविध पक्षहरूको सिआइबीले सूक्ष्म ढंगले अनुसन्धान गर्ने जनाइएको छ ।